«الدولار بقى بـ 13 جنيه.. هو محافظ البنك المركزى بيقبض بالدولار ولا بالجنيه؟!» هكذا سخر رواد موقع التواصل الاجتماعى الفيس بوك من الارتفاع الملحوظ الذى شهده الدولار خلال الساعات القليلة الماضية، وبدأوا فى تداول التعليقات والكوميكسات الساخرة بين صفحاتهم.
ويعانى الجنيه المصرى خلال الفترة الحالية حاله من التدهور، حيث انخفض سعره امام الدولار ليتخطى حاجز 13 جنيها، وهو المستوى الذى لم يسبق له مثيل من قبل، مما أثار غضب الشارع المصرى، والذى تجسد فى صورة كوميكسات ونكات ساخرة تم إطلاقها على الحالة التى وصل إليها الجنيه المصرى، كما سخروا من طارق عامر محافظ البنك المركزى.
وجاءت تعليقاتهم كالاتى:
«الجنيه خد تريقة اكتر من عدد سكان قطر ارحموه شوية»
«نسافر عن طريق البحر ونشتغل شويه هناك نجيب يورو ودولار ونفكه من الصرافة. ونجيب عربية زى محمد رمضان»
«مانجيب مطبعة ونطبع الدولار ونزود سعر الجنيه قدامه»
«العيال بتوع الثانوية العامة اللى زعلانين بصوا لحال الجنيه وهونو عليكو مصيبتكو»
«الناس اللى بتقول البلد رايحة فـ اهيه حمدالله بالسلامة احنا وصلنا ياجماعة»، «كل اللى بيحصلنا دا من غضب ابانا مبارك علينا»
«الدولار بقى 13.35 جنيه احنا نستخدم معالق الشوربه نحفر نفق ونهرب»
«الدولار اخد الجنيه ورا مصنع الكراسى كمان»
« مش كان الواحد اشترى له شوية دولارات وسقعهم كان زمانى مليونير»
«هو محافظ البنك المركزى ليه تار شخصى مع الجنيه ياجدعان»
«الدولار فى ارتفاع مستمر عشان كاتبين عليه الأمريكانIn God we trust.. بالله نثق لو كتبنا على الجنيه.. ثقة فى الله هننجح شوفه سعره هيبقى كام»
«طارق عامر لو قاصد يكرهنا فـ البلد مش هايعمل كدا»
«هو محافظ البنك المركزى بيقبض بالدولار ولا بالجنيه»
«ياجدعان حرام عليكو مش كفاية اللى حصل للجنيه من الدولار انتو كمان شاغلين عليه تريقة يالاقيها منين ولا منين».
