تعرف على مطالب البيان الجديد لحركة ضنك

اصدرت حركة ضنك بيان جديد لها اليوم وفيما يلى نص البيان .

حركة ضنك بتحيي كل الغلابة والمطحونين اللى خرجوا يوم 9/9 في 19 محافظة ونظموا 70 فعالية للمطالبة بحقهم في العيش الكريم
بنحيي كل أب وكل أم خرجوا يطالبوا بحقوق عيالهم ضد العصابة اللى نهبت قوت يومنا ومستقبل عيالنا
بنحيي كل عامل اتحنى ظهره قدام المكن علشان يوفر الحد الادنى من احتياجات بيته ويربي عياله وخرج معانا يقول للفقر والجوع والمرض ﻻ
النهاردة و بعد مرور اكتر من اسبوعين علي انتفاضة 9_9 اللى نجح فيها الغلابة في كل ربوع الوطن انهم يكسروا جدار التعتيم ويوصلوا صوتهم للعالم ان فقراء مصر مش هيسكتوا عن حقهم بعد كده ..فكان التدشين الحقيقي وميلاد الحركة في كل بيت وكل حارة وكل شارع
انهرده حركة ضنك بتعلن لكل الغلابة في وطنا المنهوب رؤيتنا للنضال في المرحلة اللي جاية علشان نحقق مطالبنا ونجبر اي سلطة على انها تحط مطالب الشعب قدام عنيها كهدف وحيد.
الحركة هتشتغل المرحلة اللى جاية علي ٣ محاور بالتوازي
المحور الاول: محور التوعية بالحقوق الاقتصادية والاجتماعية للمواطن ..ودة هيتم عن طريق حملات توعوية و حملات طرق ابواب هنرفع فيعا شعار “وعي” علشان كل الناش تعرف حقوقها .. ومافيش عامل يتسرق حقه في مصنعه اللى بناه على كتافه .. ومافيش فلاح يتسرق عرقه اللى تعب فيه جوه غيطه .. ومافيش غلبان يبات من غير عشا ومافيش مريض يموت مش لاقي العلاج
انزلوا معانا في الشوارع وفي المصانع وفي الغيطان وفي البيوت .. هنوعي كل الناس بحقوقها .. مصر كلها لازم تعرف حقها فين وعند مين
المحور التاني هو محور الغضب المجتمعي، و ده هيتم عن طريق تنظيم فعاليات احتجاجية و سلاسل بشرية ووقفات أمام الهيئات الحكومية المختلفة، يشارك فيها الغلابة والمرضى والمطحونين، للاحتجاج علي غلاء الاسعار و انخفاض الدخل الشهري للفرد و انتشار المرض و غلو الادوية و وهنرفع فيها شعار ((رخصتونا)) .. علشان كل حاجة بتغلى الا المصري بس هو اللى بيرخص
المحور التالت هو الحشد المجتمعي علشان المطالب الرئيسية للعمال و الفلاحين وسكان العشوائيات و الطبقات الكادحة من خلال فعاليات احتجاحية ثورية غاضبة جوه المصانع والشركات و امام بنوك التنمية والائتمان الزراعي و امام الجمعيات الزراعية وامام وزارة الاسكان وصندوق تطوير العشوائيات .. المجتمع المصري كله هيحتشد وهيتجمع ورا مطالبه الرئيسية وحقوقه المهدره، وهنرفع شعار “حقي بايدي”
كلمة اخيرة لكل الناس .. ضنك مش بتاعة حد .. ضنك هي كل الناس .. ضنك هي كل غلبان وجعان وفقير وتعبان ..
30 قناه كل يوم بترمي ضنك باتهامات باطلة مالهاش اساس .. مش عاجبهم اننا بناضل ضد الجوع .. وكل مذيع فيهم بيقبض بالملايين وبيركب اخر موديل وبيعيش في فلل وقصور وبيطلع كل ليله ف برنامجه عشان يتاجر باﻵمنا و همومنا و مرضنا
مهما قالوا ومهما اتهموا … ضنك هي الغلابة وهي الفقراء وهي المرضى وهي المطحونين
ضنك هتفضل صوت الفقر وصوت الجوع