أسباب كثيرة تدفعني للمشاركة في الإنتخابات الرئاسية المقبلة حتي لو كانت مسرحيه هزلية معروف نتائجها مسبقا ولكن ” لازم نرسخ مبدأ الديمقراطية وإن رئيس مصر لازم يجي بالصندوق ويمشي بالصندوق” وبغض النظر عن ما حدث مع أول رئيس منتخب ” بس عادي أدينا بنتعلم ” .
وبعدين نقاطع الإنتخابات إزاي يعني أنتو عايزين الغرب ” ولي نعمتنا ” يقول علينا إيه مش بتوع ديمقراطية ولا اللواء عمر سليمان ربنا يرحمه ويعطية الصحة والعافيه “وفقا لتوفيق عكاشة ” يشمت فينا ويقول ما قولتلكم إحنا مش بتوع الكلام الفاضي ده ومش مؤهلين للديمقراطية علشان كده لازم نشارك ونتفرج علي المسرحية مش يمكن تطلع حلوة .
أنا عن نفسي هشارك ومش بس كدة أنا حسمت إختياراتي من دلوقتي ومش هستني بقا برامج واوجع دماغي حاجة من الاتنين يتقول حادي بادي كرنب زبادي أو تختار بين علي أسس علمية ومنطقية وده اللي أنا اخترته .
حملة المشير جمعت 450 ألف توكيل هما بعدين قالوا إنهم قدموا 200 الف بس واللجنة العليا أعلنت إنهم 188 الف توكيل بس عادي غلط في الحساب أي حد يقع فيه ودي مسئولية الواد اللي كان قاعد يعد التوكيلات أو يعم إعتبرها حرب نفسية دي إنتخابات وكل حاجة متاحة .
وبعدين حمدين كان جزء من نظام مبارك الفاسد لانه كان في المعارضة والمعارضة جزء من النظام مش عايزة فكاكة يعني انما المشير ده كان مجرد رئيس لجهاز المخابرات الحربية يعني ملوش دعوة بنظام مبارك خالص .
سيبك من كله ده المشير وقف الاخوان عند حدهم ووراهم العين الحمرا وقاد ثورة 30 /6 وكان شايل كفنة علي يده أينعم هو كان وزير دفاع الإخوان وكان وآكل شارب نايم مع أعضاء مكتب الإرشاد وهدد المعارضة ولو مرسي سمع إلكلام ولغي الإعلان الدستوري وغير حكومة قنديل في الوقت المناسب مكنش بقي فيه 3/7 وكان السيسي فضل وزير بالعكس كان هيترقي ويبقي رئيس وزرا كمان .
كل ده حمادة وإدارته لشئون البلاد خلال فترة ما بعد الاخوان حمادة تاني خالص ده فض اعتصام رابعة والنهضة في كام ساعة وأنقذ البلد من حرب أهلية اينعم مات ناس كتير بس مش مهم المهم الإستقرار والأمن علشان البلد تمشي .
أنا حسمت أمري وصوتي للمشير : لإنه إستطاع تخفيض عدد السكان في 8 أشهر أكثر من مبارك وطنطاوي ومرسي وحتي برامج تنظيم الاسرة بتاع سوزان مبارك لم تستيطع تحقيق ما حققة السيسي.
صوتي للمشير : لإنه الأقدر والاجدر علي تقيلب الإخوة الخليجيين واخد منهم في أقل من 9 شهور أكثر من 36 مليار جنيه وهو ما لم يستطيع أحد غيره فلعة ولا حتي مبارك حليفهم الاستراتيجي .
صوتي للمشير : لانه إستطاع العودة بعقارب الساعة للخلف فعظم أبناء جيلي لا يتذكر مصر خلال التسعينيات ولكنه يشاهد الان أدق تفاصيلها من تفجيرات واقتناص رجال الشرطة من الشوراع ومن امام منازلهم ومش بس كدة ومن داخل مكاتبهم واقسامهم .
صوتي للمشير : لأنه استطاع إعتقال رموز ثورة يناير وهو ما فشل فيه طنطاوي ومرسي علي مدار أكثر من عامين ونصف .
صوتي للمشير : لان الإرهاب بدل مكان في سيناء وحدها بقي في كل شبر في مصر وكل واحد متوقع انه يموت منفجر في أي لحظة وفي أي مكان .
في النهاية سيادة المشير أعلم ان صوتي لن يغير في الامر شيئ وانصارك هقولوا في ستين داهيه انت والآلاف الاصوات اللي ذيك بس خد بالك من خلع مبارك الشباب ومن أسقط مرسي الشباب ايضا ودوركم انحصر علي اللحظات الاخيرة وركوب الموجهة
صوتي سيكون لك سيادة المشير السيسي : حال نجاحك في عقد مصالحة شاملة يكون طرفها الاول الاخوان المسلمين احد أهم أقطاب الحياة السياسية المصرية وان تستطيع إطفاء النار اللي في قلوب كل من فقد اب اوابن او اخ اواخت او صديق عزيز عليه في عهد .
صوتي سيكون لك سيادة المشير : بعد الافراج عن كافة المعتلقين وتوقف الداخلية عن ممارستها القمعة واقتصار دورها علي مواجهة تجار المخدرات والبلطجية وبسط الامن الحقيقي في الشارع وانتهاء ظاهرة السرقة بالاكراه والاغتصاب واعلاء دولة القانون حتي مع الخارجين عليه .
سيادة المشير افعل ما شئت كما تدين تدان.
